कसे आले होते प्रकरण उजेडात..
एचएमटी भाताचे संशोधक दादाजी खोब्रागडे यांचे प्रदीर्घ आजाराने रविवारी सांयकाळी वयाच्या ८५ व्या वर्षी निधन झाले. या संशोधकाला २००७ मध्ये महाराष्ट्र सरकारने कृषीभूषण पुरस्कार देऊन गौरव केला होता. परंतु यावेळी देण्यात आलेल्या ३० ग्रॅम वजनाच्या सुवर्णपदकच्या ऐवजी केवळ सोन्याचा मुलामा देण्यात आलेले पदक देण्यात आले होते. म्हणजेच भ्रष्टाचाराने बरबटलेल्या शासकीय व्यवस्थेने येथेही एका संशोधकाची क्रुर थट्टा केली होती.
२००७ साली दादाजी खोब्रागडे यांना कृषी विभागाने संशोधनाबद्दल सुवर्णपदक जाहीर केले. यावेळी ३० ग्रॅम वजनाचे एक सुवर्णपदक त्यांना देण्यात आले होते. परंतु दादाजींची परिस्थिती हलाखीची झाल्याने त्यांनी ते सुवर्णपदक विक्रीसाठी सोनाराकडे नेले. त्यावेळी सोनाराने त्यांना फक्त ५०० रुपये भाव दिला. दादाजींने त्यांना ३० ग्रॅम सोन्याचा भाव फक्त पाचशे रुपये कसा असा प्रश्न विचारला. त्यावेळी सोनाराने सांगितले, की या पदकाला फक्त सोन्याचा मुलामा देण्यात आला आहे. यावेळी सुवर्णपदाकांमधील भ्रष्टाचार उजेडात आला होता.
सरकारी नियमानुसार सुवर्णपदकात किती ग्रॅम सोने...
कृषी विभागाने त्यावेळी सुवर्णपदक बनविण्यासाठी दिलेल्या कंत्राटामध्ये स्पष्ट केले होते, की हे सुवर्णपदक ३० ग्रॅम सोन्याचे असावे. तसेच त्यावेळी एका सुवर्णपदकांची तत्कालीन किंमत ही ३२ हजार २५० रुपये एवढी होती.
चंद्रपूर, विदर्भ असो वा राज्य आपल्याकडे येणाऱ्या प्रत्येकाला त्यांनी आपले संशोधन मुक्तहस्ते दिले. त्यांनी विकसित केलेली एचएमटी ही धानाची प्रजाती आजही देशाच्या विविध भागात उत्पादित केली जाते.
सामान्यातून आलेल्या या धान संशोधकाची ३ वर्षांपूर्वी लकवाग्रस्त झाल्याने बिकट अवस्था झाली. राष्ट्रवादी काँग्रेस पक्षाने त्यांना ५ एकर शेती संशोधनपर दिली होती. मात्र धान शेत नापिकी झाल्याने त्यांची आर्थिक स्थिती खालावली. आपले ज्ञान उदारपणे लोकांना वाटणाऱ्या दादाजींना आयुष्याच्या उत्तरार्धात छोट्या-छोट्या गोष्टींसाठी संघर्ष करावा लागला. शेवटी त्यांच्या मुलाने शासनाकडे मदतीची मागणी केली. फेसबुकवर सुरू असलेले 'दादाजी खोब्रागडे मदत अभियान' शासन स्तरावर खळबळ उडवून गेले.
- eenad Marathi, Chandrapur
